Fiction: Zoramchhani

- Muankima

Chu hmunah chuan engtia rei nge a ṭhut tawh a hre lova, engtia rei nge a la ṭhut zel dawn pawh a hre hek lo. A hre lo a ni mai lova, a nihna takah chuan chutiang mai mai a ngaihtuah tel hman thlawt lo a ni zaw ber..

Kristian chhungkua a sei lian a ni a, naupan lai ata nu leh pa thuawih thei, ai upa zah thiam leh nungchang mawi em em mai a ni a. An țhenawm khawveng te paw'n an fate zilhna atan "Zoramchhani ang saw nih tum rawh.." an tih hial ṭhin khawpa khawtlangah pawh a mizia leh nungchang vanga hriat hlawh a ni. A nu leh paten an kaihhruai ṭha bawk a, Kohhran a bel tlat a, Sunday School pawh hmaih lova chhiar kim thlap zel mi a ni a. Chu chu miin an hmuh leh hriat dan a ni a, a nun ṭhin dân pawh a ni..

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

Secondary a zawhin Kolkata lamah Womens Christian College ah College a zawm a. Chu College-ah chuan nu leh pa kaihhruaina a dawng nitin ta lova, a ṭhian kawm te pawh changkan leh tunlai thupui ber ber te an lo ni ta a. Mahse a hnampui a kawm duh chuan duhthlan tur nei miau hek lo le.. Mahse a nu leh pa kaihhruaina vangin kum khat dawn chu a danglam ngam a; dawihzep, hmanlai, ṭhing nih a hlawh chho mawlh mawlh..

A ṭhian kawmte titi ber chu 'tunlaina leh changkanna' a nih miau avangin a rilru chu muangchangin hnehin a lo awm telh telh a. Kum a tawp dawn meuh chuan an hostel bul lawka Xavier Boys Hostel a awm Aizawl badboy in la gangster viau ṭhin 'Zonunmawia' a star hlum lo chauh tawh! Amah a felin a lo chhe lo bawka rei a star lo kher mai, Zonuna pawh chuan a hriat rualin hnar phal lovin an inngaizawng ṭan a ni nghal der!

Zonuna chu a duh em avang chuan Krista duhdan leh a nu leh pa ngaihdan tur pawh ngaichang lovin Zonuna hlimna tur ngawt chu a thupui a. Party na lamah pawh a kal ve ta zauh zauh.. Mahse ṭawngṭaina nen hum sual dai lo turin a la țang ve nasa..

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

A inngaihtuah kual nasa... Nunin awmzia a nei hian a hre tawh lo. Inlama an lo hriat dan lah khitiang khi a nih laiin a dinhmun erawh heti hi a ni ta si..

An college a sorkar damdawiin lamin clinic an rawn neih ṭuma a thisen result counsellor in a hrilh lai kha a la hre reng. Kum 18 tlin lawmna'n thisen pek a tum a, a thisen an lo hnawl sak ta a nih kha.. Khatih darkarah kha chuan khawvel hi chawl ṭhuap niin a hria a. A lungphu bak ri dang reng reng awm lovin a hria a nih kha. Khatih laia a ṭap thei miah lo kha a nat loh vang a ni lova, a zâm loh vang a ni lova, a mangan loh vang a ni lova, a beidawn loh vang a ni lo.. Amah vanga beidawng a ni lova, khawvelin a nihna a hriat huna a chunga khawvel awm dan tur a mitthla leh suangtuahna vang zawka hlau leh beidawng a ni zawk. A beidawnna chu beidawng a lo intih ve tawh ṭhinna zawng zawng kha belhkhawm vek pawh nise, chumi buk kang la la thei tur khawpa rit a ni tuna a beidawnna hi chu..

Party-na lama Zonuna ṭhianho zuia a kal țum 5-naah khan tunlai ve châkna a do zo lova, beer a in ve ta a, in ngai lo tih takah a lo ruih theih nasa mai si a, a dang pawh rui kai tawh dawn tawi luatah a lo pawisa lo palh ta hlauh a nih kha. A inchhir em avanga a tuk zinga an chaplain hnena a kal nghal thu te, a nun sima kawng dik a zawhzui nghalzia te, amah anga a ṭhalaipuite'n an dai sual ve a hlauhzia te hi au chhuahpui ve a châk a sin.. Mahse a ngam ngang lo a ni..

An chaplain fuihna angin a hunah check-up a ti zat zat a. Mahse tunah chuan hei a taksa ralvengtu (CD4 Count) an enchhinnaah damdawi (ART) ei țan ngai a lo ni ve ta hial mai si.. Theih tawpin ei leh in lamah induatin invawng uluk mahse, rilru ber a chauh tlat si chuan taksa ralvengtu pawh a lo chau hma a ni mahna..

ART chu ṭha takin ei ta se midang hnena HIV hrik a kaichhawn theihna chance kha 90% vel laiin a la tlahniam thei tih leh hrisel takin a damrei phah zawk dawn tih hrilh hriat a ni tawh a, chuvangin ei ngei a duh.. Mahse a ei a nih thung chuan a hre lo tur turin an hriatphah palh thei a, chuti a nih hlauh chuan hmuhsitna nen hringnun a hman a ngai tawh dawn si.. A dam zel dawn a nih pawhin midang veng tura a au chhuah ngam si loh a, a chhungte leh khawtlang thinhrik hlawha phurrit mai a nih dawn ai chuan thih mai chu awlsam zawkin a hre ta rum rum hial a... Chuvang a ni masi hmang tura mahni khawlama a ṭhiante liam vek hnua an hostel balcony ah beidawng vawr tawpa a lo indawm kun tlawk tlawk mai ni!

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

Nia, Zoramchhani hian humsual a daia a, ama thiam loh vang liau liaua kai chu a ni. Mahse kai erawh a duhthu vang a ni lo... Tupawh tih sual leh daipelh nei thei kan ni a, mi tawlhthlu hmua kai tho ṭhin hnam, Mizo kan nihah hian chiang ila, kawnglai tawhsual tawk buaipui ṭhin sakhua, Kristian kan nihna ah hian i ding nghet ang u.. Chutih rualin ṭhalai lam pawn condom aiin nun uluk leh Pathian ṭih a him zawkzia i chiang ang u..

Zoramchhani hi inpuang ngam lo ta se eng thil nge thleng ang? A chhungte leh ṭhenawm khawveng te tan a him zawk ang em? Zonunmawia kha chhan tlak a la ni ang em?

Chung zawhna chu kâ ni lova nun hmanga chhan chi a ni a. Hriatfiah tawk lohna hian ngaihdan dik loh min put tirin hlauhna a siam ṭhin si a. Hawh teh u, kan ram leh hnam chhan tur hian awareness nei tluk tluk ila, awareness chu i chhim tluk tluk mai teh ang u. Kan buatsaih thei ngang lo a nih pawhin HIVAIDS chungchang hi 1907 ah man chawi lova biak theih leh zawh theih reng a nih kha..

Hawh u, he thawnthu lungchhiatthlak hi a tawp dan ngaihnawm taka siam turin ZORAMCHHANi hi ZONUNMAWIa i chhanchhuah tir ang u..