Condom leh hriau chungchang hi!

- Muankima

Social Media lamah duhtawkin post siam leh comment hmangin kan sawi fo bawk a, ka hmuh dan kan sawi ve reng reng teh ang.

Condom Promotion leh Needle Syringe Exchange Programme (NSEP) hian engnge a tum ngaihtuah chiang map lovin ṭhut hmun aṭangin kan sel a, a zirchianna pawh nei map si lovin HIV kai hmuhchhuah zat a lo la sang zel bawk nen lukhawng nei lo ang hrimin heng harm reduction project hi kan chirhtheh a. A nihna takah chuan heti khawpa ven tum a nih chung pawha a san zel chuan, ven tumna hi awm lo hrim hrim ta se engtiang chiaha sang nge a nih ang tih lam erawh kan chhut lem hlei lova!

HIV kai tawh mi tam tak ka lo titipui ve tawh ṭhin a, a bikin chung zinga kum lama nau zawk, tleirawl lam, mipat hmeichhiatna aṭanga kai ni awma inring zinga a tam zawk mah hi Condom Promotion in an thinlung a thlen phâk loh vang ni pawhin a sawi theih mai awm a sin.

Kan ngaihzawng an nih vang maiin mi hi HIV lakah an him ngawt bik lova, Kohhran leh khawtlanga zah kai an nih avang maiin an him bik lo tih leh amah leh a thuam a fai ving veng avang maiin a him ngawt bik lo tih hi vawiin thlenga kan la chiang thei lo hi a pawi.

Ni e, a dik a lawm. Kan Kristianna hi kâwrah chiah hmang lovin Bible zirtirna ang hian mi zawng zawng hi nung ila mipat hmeichhiatna vangin he HIV hi a darh lo tawp ang. Mahse, mi hmuh leh hriat chinah chiah kan thianghlim emaw tih mai tura kan nun kan thlahdah avang leh Condom Promotion kan hnualsuat tel zel vanga eng ang hlei thei lo kan ni zâwk mah.

Condom Promotion hian tumah sex hmang turin a sawm lo. Miin thlahdah taka a nun a hman a, inven a tum si loh chuan chumi rah chhuah chu thianghlim leh rinawm taka kawppui te tan chiaha inserh hrang te thlenga tuarna a nihzia hriain, "Pathian leh a Bible zirtirna in zah zo lova, in hurmu keh in insum thei hlawl lo a nih pawhin in hmangaih te himna tur atan tal Condom hi lo hmang ṭhin ang che u.." tih hi Condom Promotion theme ber chu a ni zawk a. Hoarding leh poster mai bakah, TV lama an awareness tih chhuahah te hian chutiang kilh kelh chuan ziak ni ta se, tlan paha chhiartu tan chhiar hman a nih dawn loh vang zawka heti hi kan ni ta tih hi kan ngaihtuah duh tlat lo mai hi mak deuh chu a ni.

Needle Syringe Exchange Programme te lahin hnawk titu kan la tam em em a. Damdawi hmangsual tu leh fa nei te ngei ngei zingah pawh he programme do ran te kan la awm leh zeuh ṭhin.

Thil danga changkanna kawng kan um fe tawh hnuah - addiction hi zilha sim mai theih, a vuaka vuak sim theih emaw tihna rilru hi kalkana engtin nge khawvel thiamna in a enkawl dan min hrilh tih lam te hi kan zirchian a hun ta..

Drugs Addict tia kan sawi mai ṭhin te hian syringe an hmuh vang ni lova addiction vang zawka rei tak an insumkar tawh hnuah pawh damdawi bawk khawih leh ṭhin an ni a, an thisen zungzama châkna bet tlat tawh khan withdrawal (suffer kan tih mai kha) an paltlang vek hnuah pawh a kuai lungleng leh mai ṭhin a ni. Addict kan tih zinga a tam zawk mah hi chu, damdawi tel lova pangngai tawh lo, an taksa leh rilru za ru tlat tawh an ni zawk fo a. Nuam an tihna vang ni lovin an hrehawm chhawk tura inchiu leh mai ṭhin an ni zawk fo.

Miin damdawi hmang suala a addict tawh a nih chuan nitina vawi 3-6 tal inchiu reng mai leh ṭhiante nen pawh eng emaw changa lo inhmanpawlh palh thei an nih avangin HIV kai theihna chance nei sang hle mahse, heng IDU (drugs rui tura inchiu ṭhin te) zawng zawng hi HIV kai tawh ang hiala kan melh hrek hrekna nun pawh hi kan kal kân a ngai ta.

A nihna takah chuan Proxyvon leh parvon hunlai ata tawh la inchiu rui ngat ngat, vawiin thlenga la him tam tak an la awm. Anni hi Needle Syringe Exchange Programme (NSEP) ngai pawimawh ber ber leh fimkhur ber ber an ni châwk.

Hriau thianghlim lo inhman ṭawm aṭanga kai tam ber hi tunlai zawk leh naupang zawk, zirtirna dawng ṭha zawk tur ni awm tak tak an ni zawk tlat zel te hi a chhan kan chhut chiang ngai em?

Miin an inchiu ṭhin tih an hriat an hlauh luatah heng programme te leh an mahni zirtira buaipuitu tur TI (Targeted Intervention - AMRO, Samaritan, CPD etc ang te hi) te an belh ngam loh vang a ni zel zawk fo.

Condom Promotion ang chiah khian NSEP pawh hian, "Pathian inzah zo ngang lova, in châknain a tur nasat luat vang che u a in insum zo ngang lo a nih pawhin, in hmangaihte an him theihna atan tal inchiuna hriau hi lo inhman ṭawm lul suh u.." tiin a ngen lawm lawm a nih zawk hi. Ruihhlo promote na lam a kâwk lul lo e..

Mipat hmeichhiatna leh ruihhlo a insum thei lo te hi, keini'n kan hmangaih hlei thei lo a nih pawhin Pa hmangaihna chuan a huapzo vek mai si a, chhandam an nih theihna tur chuan an nun kan venpui a ngai si a. HIV hi lo kai palh ve ni ta se nun invawng tak vanduai palh te angin an inngaihtuah sawk sawk kher lo thei a, chu chuan an nut pawt tawia an thalrau chhanchhuah hman lohna a thlen theih piah lamah, he natna hrik HIV darh zel theihna kawngah kawngro a su miau si a, kan him theihna leh kan d theihna atan kan buaipui a ngai a, Van Lal lung tiawi tura a hmangaihte ngaihtuah hi kan ba a ni zawk mah awm a sin.

Hawh teh u, kan ṭhuthmun aṭanga mahni ngaihdana lo do mai lo hian, heng ruahmanna awm sa thuam chaka a thawktute finchhuah tur zawk hian kan ngaihtuahna te hi seng ila, kan ram leh hnam chhan tur hian i ṭangrual zawk teh tak ang u..