90-90-90 bihchianna!

- Muankima

HIV vanga natna - AIDS hi a tihdam theih loh tih kan hre ṭheuh a. A tihdamna ṭha ber chu kai lo tura inven hi a ni rih deuh mai tih pawh kan hre ṭheuh. Chuvangin khawvel puma HIV/AIDS do tura inzawmkhawm pawl - Joint United Nations Programme on HIV/AIDS, a tawi zawnga UNAIDS an tih mai chuan 90–90–90 strategy/targets a duang chhuak ta a. Chu target/strategy chu a ni tuna kan sawi fiah tur hi. HIV/AIDS chungchanga inzirtirna kan dawnah a ri tel zeuh zeuh si a. Engnge a nih chiah a, engnge kan lo tih ve theih tih ngaihtuah rân chunga chhiar kan tum hram hram dawn nia.

Kum 2014 khan Joint United Nations Programme on HIV/AIDS (UNAIDS) leh a thawhpuite chuan partners 90–90–90 targets hi an kalpui ṭan a; he target in a tum ber chu HIV Positive zawng zawng zinga 90% tal hmuhchhuah a, chung hmuhchhuah zinga 90% tal chu antiretroviral therapy (ART) treatment pek a, kum 2020 ah chuan chung treatment la zawng zawng zinga 90% tal viral suppression neih tir hman a ni. Chu chu a taka thlen theih a nih hlauh chuan 2020 ah chuan HIV Positive zawng zawng zinga 73% zetin viral suppression an nei thei ang a, chuti a nih chuan kum 2030 ah chuan HIV/AIDS vanga natna hi do rem theih beisei a ni!

Mahse kan tun dinhmunah hian khawvelah mi 36.9million zetin HIV an pai mek a, 2015 kum chhung ringawta an hmuh thar zât pawh 2.1million zet zu ni a! Chuvangin hetianga kai thar an tam em avang leh he programme report te en chuan 90-90-90 hmanga 2020 a HIV kai tawh zawng zawng zinga 73% te viral supression neih tir a, kum 2030 a do rem hi a taka chantir a beiseiawm lutuk loh hle rih chu a nih hi..

HIV Positive, an nihna la hre lo te tuam chhuah a, tuna a kai tawh zawng zawng zaa sawmkua hmuhchhuah tumna hi tam tak chuan an ngai khaw lo fo a. A thawktuten hmuchhuak tam anga lan duh vangin an report dik lova, an report pung țhin ni ten an sawi fo mai. Mahse a nihna takah chuan ID nena link a nih vek avangin mihring awm lo detect thar ngaihna a awm lem lo.

Tun dinhmunah pawh Mizoram hi detection/infection rate ah kan san viau avangin a thawktute dem zawnga ngaihdan vawrh darh chiam te, Kristian zaah zaa kan lo inchhal țhin avanga zaka pawm hlei thei lo te pawh tam tak kan awm. Mahse, duhthusamah chuan vawiin hian a kai zawng zawng detect vek ila, kan state hi mualpho vawrtawp pawhin mualpho mah ila an natna hriatchhuah zawng zawngin treatment ṭha taka an la ṭhap a nih si chuan khawvela AIDS dorem hma ber state kan ni thei daih zawk dawn tihna a nih ber chu. A kai tawh nun tam tak kan pawtsei ang a, a la kai lo te kai lo tura venhim a sam sawt ang.

Zah vang leh mualpho hlauh vang hian a kai tawh te ngei ngei hi an natna hre lovin dah ta vel mai mai ni ila, treatment la lovin an thle vel mai mai dawn tihna a ni a. Chuti a nih chuan a kai hriat chhuah si loh chuan him emaw intiin a thihpui vat ang a, treatment la chung pawh midang la kai palh thei tho ta chuan treatment la lo phei chuan a kai thei nasa khawp dawn mai si a le, boral leh pulh puk kan hmabak tihna a ni ang!

Miin treatment ṭha taka a la a nih thung chuan a taksaah pawh HIV do let tura taksa ralvengtu te pawh hmuh tur awm lo hial khawpin he natna hrik hi a taksaah a dang chep thei a. Chuti a nih chuan treatment a lak hma aiin 90% vel zetin midang a kai chhawn a hlauhawm loh zawk hial ang. Chutiang chu ani khiti laia viral depression kan tih sek khi ni! Thla hmasa lawka UNAIDS Feature Story ah phei chuan Virally Suppress tawh (Viral Load count an neih saka undetectable - an taksa a HIV dolettu taksa ralvengtu hmuh tur awm tawh lo) chuan sex hmangin midang a kai thei tawh loh thu a ni a. Chuti a nih phei miin treatment a lak ṭhat chuan a hrisel phahin AIDS lak aṭangin a him dawn a ni ringawt lova, hmabak neiin hmangaih a nei thei a, nupui/pasal faunau neiin HIV kai darh miah lovin chhungkua a din ve thei dawn tihna a ni a. Mahse chumi tur chuan treatment (ART) a ngaihpawimawh hle a ngai thung.

Chuvangin i thisen zungzamah HIV hi hmuh a ni palh ta hlauh a nih chuan - mi mitmei leh miin an sawi dan tur che ai chuan treatment i lâk ṭhat loh mawlh kha hlau zawk ang che. Treatment hi i lak ṭhat zawh poh leh i tan a ṭha a, i kai tirha i inhrechhuak nghal thei a, i la nghal thei a nih phei chuan a ṭha hlei hlei. I nun i pawtsei ang a, i hmangaihte i kai palh theihna laka ta nasa takin a veng ang che. Nangmah mai ni lo, i chhungte or in thlah kalzel zingah pawh kai palh an awm chuan mi mitmei leh ṭawngka aia treatment khaihlak kha hlau turin lo fuihin lo zirtir mawlh ang che..

Kai palh rau rau chuan a hma thei ang bera treatment lak a ṭhat si chuan hawh teh u, kan inrinhlelh feih feih emaw, vanduai palh theihna dinhmuna kan ding nia a lan zeuh tawh hi chuan mahni dinhmun hre turin i in test zung zung zel ang u khai..

Chutih rual chuan Bible mil hian nun hmang ila, vanduai theihna chance a tlem khawp mai a, Condom leh hriau thianghlim ai pawhin a him zawk tih hriain mi hmuh leh hmuh lovah pawh nun danglam nei thei turin kan rinna hi i sawhnghet sauh sauh ang u khai..