HIV/AIDS Denialism hi kan hriat ve a ngai!

- Muankima

Social Media a kan ziah ve hian a nihna hrechiang lo ten thutak hla takah an lâk palh mai theih avang leh chu zirtirna dik lo chuan nghawng rapthlak tak a neih theih avangin he thu hi ziah ka tum ngai lo a, mahse mi tu tih hriat lohin Denialist zinga mi Dr. Biswaroop Roy Chowdhury lehkhabu ziah "THE GREATEST LIE OF 21st CENTURY" chungchang letlinga a rawn thehdarh tâk vakah chuan tunah chuan ziak lo thei ka ni ta lo! Ka ziah loh chuan thil nihna tak ka hrilh theih te zingah he doctor sumdawnna hi thutak hla taka ngaia nun thlahdah taka hmanga a hun hmaa nun chân palh awm theih a ni si a.

Ka chhungte emaw, țhiante emaw, hmelhriat leh min hretu te zingah zirtirna dik lo vanga tuartu an awm ka duh lo a, chuvangin thil nihna an hmuhfiah ve theihna atan ka hriatchin tal hi ka ziak lo thei lo. A hre zawk leh thiam zawkte'n an sawifiah zawm tur tal pawhin..

Hman ata tawh HIV/AIDS hi ring lo pawl an awm țhin a, chutianga a awm rin lohna chu HIV/AIDS DENIALISM an tih chu a ni. HIV natna hrik te hian AIDS natna a thlen lo tih hi DENIALIST (ring lotu) lam țan chhan a ni a, mahse chu chu medical leh scientific lama evidence awm sa zawng zawng nen a inkalh tlat si!

Denialist hriat hlawh zual te pawh hi an țanna a in ang lo leh zel a, a țhenin HIV natna hrik pawh hi awm lo anga an sawi laiin a țhen chuan HIV hrik hi chu a awm ngei a, mahse natna hrik pakhat ve mai, taksa tichhe lutuk lem lo leh AIDS natna thlen thei lo niin an sawi thung. Țhenkhat ve leh thung chuan HIV hrik pai an hmuhte treatment an pekna ațanga AIDS natna hi lo piang niin an sawi hem mai!

Scientific evidence awm zawng zawng hian HIV hi a awm ngei zia leh AIDS natna thlentu a nihzia a tihchian em em laiin Denialism hi chuan a HIV hrik awm lo anga lan tir dan kawng leh AIDS natna thlentu ni lo anga lan tir theih dan kawng a dapkhawm thung tiin a sawi zawngin kan sawi theih bawk ang. Chuvangin Denialist te pawh hian zuitu an ngah theihna atan thu a dik leh dik loh fiah tum lo ho rut khawm turin chutiang ang mi tamna Internet kaltlangin chet an thawh/la ber țhin.

Denialism hian scientific evidence pakhat mah nei lo mahse ram țhenkhat hruaitu zingah pawh thlawp an awm ve tho a. A bikin Africa khawmualpuia ramte zingah an awm zual bik niin a lang. South Africa a denialist zinga mi Thabo Mbeki a president lai khan HIV/AIDS Denialism vanga an tana damdawi țha ni reng si la ngam ta lo an pung chak hle niin scientist te leh physician te chuan an sawi a. Public Health Research lam buaipuitute chuan khatih hunlai khan South Africa ah AIDS vanga thi mi 330,000 ațanga mi 340,000 vel awmin, mi 171,000 velin HIV hrik an kai thar a, naute 35,000 vel zetin an awm niin an chhut.

HIV hrik kai ten he natna hrik an taksain a dona kawnga puitu tur damdawi an ei antiviral treatments (ART kan tih mai hi) miin a khaihlak zeuh pawh hi atan a țhat loh avang leh midang tan a him loh avangin khawvelin a ngaimawh a, chuvangin UNAIDS kaltlangin kan ramah phei chuan khaihlak lova an dawn theihna atan a thlawnin ART Centre a in register te chuan an dawng char char a nih hi. Chumi mai pawh chuan Denialist ho țanfung - HIV/AIDS hi sum siamna atan mai maia dawt phuahchawp anga an sawi țhin hi dâwt a nihzia a pholang chiang hle awm e. Ngaihtuah ve ta la, HIV kai mi pakhatin thla tin Rs. 3000/- man vel a thlawna ART a dawn chuan a kai zawng zawng te hnena thlatina an semral tur chhut ila, a turu buru lutuk ringawt! Sum siamna ni lovin inkhawhralna a ni zawk mah! Mahse, kan hmangaihte chhan tur leh an damna tur chuan kan neih zawng zawng pawh kan pe ngam miau a, chuvanga hetiang thleng thei hi kan ni ber awm e.

Lo chhut chiang ve mah teh:

Hetia HIV/AIDS Denialism in kan ram a luhchilh ve tâkah chuan, thutlukna atthlak tak i siam lohna turin heng tal hi lo chhut chiang hmasa ve hram ta che:

- Dr. Biswaroop Roy Chowdhury ziah "THE GREATEST LIE OF 21st CENTURY" tih kha dawt a ni lo! Kha lehkhabu khan Denialism a nih avangin scientific prove pakhat mah awm lova an dinhmun sawhnghet tura țanfung fawmkhawm a ni a. Chu chu thudik lo a nih miau avangin kha lehkhabu kha kum zabi 21-na a dawt liam tham ber pakhat chu a ni hrim hrim..

- Dr. Biswaroop Roy Chowdhury hi Nutritionist (ei tur țha leh dik lama mi thiam) a ni a, medicine (damdawi) lama mi thiam, a siamtu lam zinga mi erawh a ni lo.

- Sawi tawh ang khian Denialist te thu leh hla hi Internet kaltlangin hmuh tur a tam khawp mai a, mahse heng thu post na site reng reng hi khawvelin rintlaka a ngaih (BBC, CNN, etc.) ang ni lovin, tlawhtu ngah duh a thu thar mak chhuah duh chi, rintlak lem lovah a ni zel. I awih loh leh google ve mah teh.

- Dr. Biswaroop Roy Chowdhury hian youtube lama ama channel ah March ni 14, 2018 khan "THE GREATEST LIE OF 21st CENTURY" clip a siam chu a upload a, viewers a ngah rem rem hle a, youtube monetization kaltlangin hei ngawt pawh hian income eng emaw zah a siam ngei ang a. He a lehkhabu ziah pawh hi miin an chhiar châk phah ta reng bawk a, hralh a kal phah chur chur hle a. A hard copy ni lo, computer leh mobile vel ațanga chhiar theih tura eBook-a an siam phei chu 'the most profitable business eBook' tiin an sawi hial a ni awm e.

- HIV/AIDS chungchanga khawvela hma latu ber chu UNO hnuaia intelkhawm UNAIDS hi a ni a, nutritionist pakhat ai chuan an buk a rit deuh! Zirchiangtu leh chhuizuitu an ngah nasa zawk fe dawn si a..

- Dr. Biswaroop Roy Chowdhury chonain chhan a hlawh loh avanga thutak ni a ring pawl te kan la awm a, a zia lo ṭhin teh e. Indian Penal Code Section 269-na leh 270-na te hian kha chona kha chhang thei lo turin mi a phuar sa zawk si a. Vaipa lehkhabu hralh tam duh vanga a hmanraw fawmkhawm buaipuiin i phul ve hlut lo teh ang u.

Hei India danpui (Indian Penal Code) chu i bih ve duh takin ka lo zep tel nghal e:

Section 269: Negligent act likely to spread infection of disease danger­ous to life.—Whoever unlawfully or negligently does any act which is, and which he knows or has reason to believe to be, likely to spread the infection of any disease dangerous to life, shall be punished with imprisonment of either description for a term which may extend to six months, or with fine, or with both.

Section 270: Malignant act likely to spread infection of disease danger­ous to life.—Whoever malignantly does any act which is, and which he knows or has reason to believe to be, likely to spread the infection of any disease dangerous to life, shall be punished with imprisonment of either description for a term which may extend to two years, or with fine, or with both.

Hei hian a challenge kha chhang thei lo turin midang a phuar sa vek a. Mi lehkhabu ziak hralh tam duh vang mai maia thu thehdarh lo thutak khukpui heti khawpa kan tam hi a zahthlak zawk tih hi khi thu letlingtu zawng zawng hian hre mawlh teh se.

Chuvangin dâwt thuthang mai mai vangin kan nun himna tur leh chhanna tur, kan ei ṭhat phei chuan nakin lama sex vanga midang kan kaidarh tur condom hman ngai miah lova la veng tu tur ART hi HIV+/PLHIV te chuan i thlah lo mai ni lovin i ngai pawimawh deuh deuh ang u..

Heti zawng zawk hian aw!

Social Media hran hranah News Group hran hran kan siam a, kan group lun se kan duh țheuh a, chumiin a rah chhuah chu thil hria nih leh hre hmasa nih inchuhna a niin a lang. Chuvang chuan miin a dik a dawk thlu lovin Internet kaltlanga a thu hmuh apiang letlingin chu group ah chuan a vawm lut mawlh mawlh a, thu thar apiang bawh duak duakten kan lo thehdarhpui chuai chuai zel bawk si. Chuvangin kan thu post turah te hian a dik ngei em tih te fiah hmasa ila, kil khat chauh ni lovin kil hran hran ațanga a nihna dik tak tarlan tel tum ila, a hre hmasatu nih aiin a hre diktu nih inchuh ta ila, kan ram leh hnam nghawng thei thilah hi chuan site laktlak vak lova ka thu chhiar fuh hi duhtawkin i letling kher lo teh ang u. Social Media hian min luhchhuahna a la rei si lova, miin an eizawnna atana an website a thudik leh dik lo pawh thlu lova tlawhtu an ngahna tura thu an post țhin dan leh sum siam tura Social Media an hman dan kan la hrethiam pha lo nawk mai si a, chuvangin hawh teh u i fimkhur zual zel ang u.