Blog siam chhan!

Mizoram ah HIV a darh zual zel a, kan inzirtira kan inchah lawm lawm a, a thawktu lamin chhun zan zawma an thawk chung pawhin kai thar zât a tlahniam hlei thei lova, chuvangin Social Media kaltlanga mitin ban phaka inzirtirna leh inkaihhruaina chhawpchhuah hi a ṭulin ka hre ta a. A thiam ber leh a hre ber ka ni hauh lo chungin, mi tu emaw talin a lo hlawkpuia, a lo sawtpui takin tiin he blog hi ka siam ve ta tawp mai a ni.

A nihna takah chuan HIV/AIDS Awareness nei tura in koh khawm hi a har khawp mai a, hriat sa leh hriat hnu a ngaiin mitin mai hian kan ngaihthah vek emaw tih tur a ni a. Mahse he natnat hrik leh he natna kan hriat fuh tawk loh vanga hetiang dinhmun hi thleng kan ni si a, chuvangin ka hriat chin leh UNAIDS thu leh hla ka chhiara midang tana ṭangkai thei tur awm ang te he hmunah hian ka chhawp chhuak dawn a, midang hnenah pawh khawngaih takin Lairil Daifim! Blog chungchang hi lo hrilh vein tlawh turin in lo sawm ve ṭhin dawn nia.

He blog ah hi chuan thingtlangpa ziak leh chhiar thiam cha cha te pawhin an hriatthiam theih tura a mawlmang thei ang bera ziah zel ka tum a, medical term te pawh a theih chin chinah Mizo awnga chhawp tel zel ka tum ve chu a ni a, chuvangin hmundanga kan Awareness dawn ṭhin te nen pawh a in ang kher lo mai thei tih kan hre lâwk dawn nia.

Hetia blog hial ka siam nachhan pawh, nakin zelah chhiar leh duhin a khawma a lo awm sa mai khan hai let a nuam a, chu mai bakah android application in he blog hi la siam leh theih a nih piah lamah Facebook lamah page ang pawha la siam zel theih a nih vangte a ni bawk.

Blog hming 'Lairil Daifim' tih hian awmzia a nei lo viauin a lang a, daifim chu van aṭanga tla, a chung nei lo ten an dawn ṭhin kha a ni a, taksa chhungrilah a awm thei lo. Mahse hei kher ka hman duh nachhan pawh, kan ngaihthah leh kan ngaihthlak peih loh, a chhiar pawh kan peih ngai loh kan tana ṭha ni si kha chhungrila inlâkluh tir kan tum vang a ni pakhat a, chuvangin Mizo literature a tuimi leh zirbing mi te pawhin min lo helh sak lo hram mai teh u.

He blog rawn tlawhtu zawng zawng te chungah ka lawm a, he blog hi rawn tlawh fo tur leh midang pawh rawn hruai belh zel turin ka sawm nghal a che u.

KA LAWM E..


- Muankima, Kolasib

Comments

Post a Comment

Popular posts from this blog

HIV LEH AIDS HI CHU THIL HRAN DAIH!

Image
-  Muankima Mizoramah Awareness kan inpek țan dan a dik tawk lo nge kan rilru sukthlek hi a fuh tawk lo ni zawk dawn teh reng ni, vawiin thlengin HIV leh AIDS hi hriatpawlh tlat kan la awm reng a, a kai leh veite thinhrik leh hmuhsit ching kan la awm fo bawk. HIV/AIDS Awareness chu hriat sa/hnu tiin kan ngai pawimawh ngai bar lova, mahse kan chian loh vanga heti hi kan la ni si! A pawi teh emaw.. Chuvangin a danglamna leh a hlauhawmzia leh a hlauhawm loh theih dan hi i han flash nawn leh reng reng teh ang. Mi tu emaw talin a lo hlawkpui tâk mialin! HIV leh AIDS chu : - HIV hi natna hrik (virus) a ni a, a lampum chu Human Immunodeficiency Virus a ni a. Mizo țawng chuan ‘ taksa ralvengtu eichhetu hrik ’ tihna a ni mai awm e. - HIV hrik kai apiang hi AIDS vei an ni lova, mahse treatment an la lo a nih chuan AIDS vei hmabak an ni! - HIV hi a inkaichhawn theih a, AIDS erawh a inkaichhawn theih loh tihna a nih chu! - AIDS hi HIV hrik kaite’n treatment (ART) an lak țhat loh avanga natna...
Read more

Condom leh hriau chungchang hi!

Image
-  Muankima Social Media lamah duhtawkin post siam leh comment hmangin kan sawi fo bawk a, ka hmuh dan kan sawi ve reng reng teh ang. Condom Promotion leh Needle Syringe Exchange Programme (NSEP) hian engnge a tum ngaihtuah chiang map lovin ṭhut hmun aṭangin kan sel a, a zirchianna pawh nei map si lovin HIV kai hmuhchhuah zat a lo la sang zel bawk nen lukhawng nei lo ang hrimin heng harm reduction project hi kan chirhtheh a. A nihna takah chuan heti khawpa ven tum a nih chung pawha a san zel chuan, ven tumna hi awm lo hrim hrim ta se engtiang chiaha sang nge a nih ang tih lam erawh kan chhut lem hlei lova! HIV kai tawh mi tam tak ka lo titipui ve tawh ṭhin a, a bikin chung zinga kum lama nau zawk, tleirawl lam, mipat hmeichhiatna aṭanga kai ni awma inring zinga a tam zawk mah hi Condom Promotion in an thinlung a thlen phâk loh vang ni pawhin a sawi theih mai awm a sin. Kan ngaihzawng an nih vang maiin mi hi HIV lakah an him ngawt bik lova, Kohhran leh khawtlanga zah kai an nih av...
Read more

90-90-90 bihchianna!

Image
-  Muankima HIV vanga natna - AIDS hi a tihdam theih loh tih kan hre ṭheuh a. A tihdamna ṭha ber chu kai lo tura inven hi a ni rih deuh mai tih pawh kan hre ṭheuh. Chuvangin khawvel puma HIV/AIDS do tura inzawmkhawm pawl - Joint United Nations Programme on HIV/AIDS, a tawi zawnga UNAIDS an tih mai chuan 90–90–90 strategy/targets a duang chhuak ta a. Chu target/strategy chu a ni tuna kan sawi fiah tur hi. HIV/AIDS chungchanga inzirtirna kan dawnah a ri tel zeuh zeuh si a. Engnge a nih chiah a, engnge kan lo tih ve theih tih ngaihtuah rân chunga chhiar kan tum hram hram dawn nia. Kum 2014 khan Joint United Nations Programme on HIV/AIDS (UNAIDS) leh a thawhpuite chuan partners 90–90–90 targets hi an kalpui ṭan a; he target in a tum ber chu HIV Positive zawng zawng zinga 90% tal hmuhchhuah a, chung hmuhchhuah zinga 90% tal chu antiretroviral therapy (ART) treatment pek a, kum 2020 ah chuan chung treatment la zawng zawng zinga 90% tal viral suppression neih tir hman a ni. Chu chu a taka...
Read more